Frohe Weihnachten

[Burgberger]

Wunderschön isch die Weihnachtszeit,
au wenn`s me regnet als es schneit.
De Vater liegt auf `m Kanapee,
a Bierle vor sich, mei isch des schö!
D` Muttter plogt sich in dr Kuche a
und fluacht ganz leise vor sich na:
"Dia bschiaßet oifach it, dia Plätzle,
weil er allat am Fresse isch mei Schätzle!"
Am Samstag got ma ins Städtle nei,
im gröschte Trubel kauft ma ei.
Dr Vater maulet: "Hol`s doch de Henker,
jeds mol des Gschiss mit de Weihnachtsgschenker!"
Ma rennt umanand, als gäb`s was umsuscht,
de Vater wiad massig, er hot an Saudurscht.
In jeden Lade muaß ma nei,
dr Vater isch bloß zum Zahle dabei.
Und hot ma endlich alls beinand,
de Chrischtbaum und a feschtlichs Gwand,
was Guats zum Trinke und zum Esse,
ma hot koi oinzigs Gschenk vergesse,
isch se endlich do, dia heilige Nacht,
dia soviel Freid und Arbeit macht.
D` Kinder hand de Chrischtbaum gschmückt,
in dr Kuche schafft d` Mutter wia verrückt.
De Vater hocket am Kanapee
beim 5. Bier, des isch it schö.
Dann duat ma esse mitanand,
de Vater stochert im Teller umanand.
Durch dia lange Warterei
muaß ihm de Hunger vergange sei.
Dann tauscht ma schnell dia Gschenkle aus,
de Vater hot scho fascht an Rausch.
Ma spürt nix me vom Weihnachtsfriede,
d` Kind sind mit de Gschenk it zfrieda,
verschlaget sich gegeseitig de Grind,
weil se neidig aufanander sind.
D` Mutter spült s` Gschirr a in dr Kuche,
ma hört se wieder leise fluache.
De Vater flacket am Kanapee,
beim 10. Bier isch alles schö.
Um elfe miaßet d` Kinder ins Bett,
d` Mutter will in d` Weihnachtsmett`.
Sie hot scho de Hut und de Kittel a,
legt `m Vater `s Gwandl na:
"Mach mer bittschön doch dia Freid
und gang mit mir in d` Chrischtmett heit!"
Do sieht sie plötzlich voll Entsetze,
mit `m Vater ka ma numma schwätze.
Er schnarcht ganz selig vor sich na,
sie kriagt `n numma wach den Ma.
Bluatnarred zieht se sich me aus,
bloased d` Weihnachtskerze aus,
macht sich alloi im Ehebett breit.
Adieu du schöne Weihnachtszeit!

ich wünsche euch allen, dass das Gedicht nicht euren heutigen Tag widerspiegelt. Frohe Weihnachten wünsche ich euch mit meinem 800sten!
Liebe Grüße Dieter